المقالات
كل ما أتعلم لغة برمجة أنساها؟ إيه الحل؟!
💡 سؤال بيتسأل كتير “أنا كل ما أتعلم لغة برمجة أنساها؟! إيه الحل؟ وأعمل إيه؟ وكل اللى بيتعلم زى ولا لاء؟“.
– قبل ما أتكلم فى أى حاجه أحب أعرفك أنت بصفتك مبرمج مش مطلوب منك تحفظ الكود نهائيًا! شايف واحد بيقولى دلوقت “أنت مجنون أمال هكتب الكود منين؟” 🤷♂️
هقولك متعصبش نفسك، المطلوب منك تعرف فكرة الكود وكل function بتعمل ايه؟ والمكان والزمان اللى أستخدم فيه الـ function دى؟ أشخاص محترفة كتير زى Bill Gates مؤسس شركة Microsoft و Mark Zuckerberg مؤسس موقع Facebook وصاحب تطبيق Whatsapp مؤخرًا، وأشخاص عمالقة فى مجال البرمجة متعلمين لغات برمجة كتيرة ومختلفة، عمرهم ما حفظوا سطر برمجى واحد! هما عارفين الـ conspt والـ syntax الخاص بكل لغة ورابطين كل function بمثال ومخزنينة فى عقلهم الباطن، عشان لما يتحطوا فى مهمة معينة يقدروا يفتكروا الـ function ويطبقوها.
💡 نصيحة: “طول ما أنت رابط كل حاجه اتعلمتها بمثال عمرك ما تنساها أبدًا.”
تعلم كيفية حل أى مشكلة بتواجهك فى البرمجة، بخطوات مثالية.
💡 مثالين هيوضحولك كل حاجه وهيثبتوا فى دماغك مدى الحياة:-
المثال الاول: البرمجة زى الهدوم بتاعتك فى الدولاب بالظبط لو مفيش حاجه تعلقهم هيقعوا على الأرض، فأنت لازم تعلق مفاهيم البرمجة فى دماغك وتحطها فى عقلك الباطن، عشان لما تحتاجها تلاقيها ، هتقولى ما أنا بنساها بردوا؟!
هقولك دى طبيعة الإنسان النسيان، لكن لما تكون متعلم المفاهيم الموجوده فى اللغات ومتعلمها كويس ومعلق كل حاجه بمثال فى دماغك، هتفتكرها بسرعة بمجرد التفكير بتركيز وبداية كتابة سطر برمجى واحد.
لكن لو مكنتش معلق المفاهيم صح وربطها بأمثلة فى عقلك، أكنك بترمى هدومك فى الدولاب وبتقولها إتعلقى إنتى لوحدك.
المثال التانى: الناس اللى بتقرأ كتب يوميًا وتخلصها، بتبقى حفظاها؟!
هتقولى لاء! خلاص أمال مزعل نفسك ليه؟ الناس بتقعد بالشهور تقرأ فى كتب وبعد شهرين تلاتة بينسوها، لكن خلى بالك مش بتنساها وكأن شىء لم يكن، هيا بتبقى عارفة الكتاب كان بيتكلم عن إيه؟ والأحداث والشخصيات اللى كانت فيه، بمجرد ما بيتذكروا الكتاب أو شخص جاب سيرة الكتاب قدامهم.
💡 فيه شوية أسأله عايز أسألهالك وأنت إسألها لنفسك:-
- أنت مستمتع بالبرمجة؟
- أنت مستمتع وأنت قاعد تتعلم البرمجة؟
- أنت مستمتع وأنت قاعد بالساعات على الكرسي وقدام الشاشة عشان تحل مشكلة واحدة؟
- أنت مستمتع وأنت قاعد بتعصر دماغك عشان تطلع بفكرة تحسن من شكل موقعك وتخلية أفضل؟
لو أجبت على الأسألة اللى فاتت بـ “لاء” لأسباب معينة “عشان أنت داخل مجال البرمجة تتعلم كام لغة والسلام وتتوظف فى أى شركة؟ أو أنت داخل مجال البرمجة عشان يتقالك يا مبرمج ؟ …إلخ”، أحب أقولك عمرك ما هتبقى مبرمج، ولو بقيت مبرمج هتبقى إسمًا، عشان أنت لو وقعت فى حب البرمجة فعلًا، عمرك ما هتزهق من البرمجة ولا تمل منها، هيبقى عندك إشتياق إنك تتعلم لغات وتقنيات جديدة! هتقعد بالساعات قدام الشاشة ومش هتحس بالوقت..إلخ.
بس وهيا دى الفكرة ببساطة، متوقفش عن التعلم أى مبرمج مَر بنفس المرحلة دى، لو فضلت واقف مكانك مش هتتحرك، كمل ومتوقفش، وفى يوم من الأيام هتضحك على الأيام دى، وقد إيه كانت أيام حلوة.
💡 لا تنسي متابعتنا على مواقع التواصل الإجتماعى، لمزيد من المقالات البرمجية.
الإبلاغ عن خطأ
×إذا وجد خطأ وتريد الإبلاغ عن هذا الخطأ، أو إذا كنت تريد تقديم اقتراح على شىء معين، فلا تتردد في إرسال بريد إلكتروني إلينا:
info@albashmoparmeg.com
شكرًا لك على مساعدتك لنا!