إزاى بحل المشاكل فى البرمجة؟!

أشخاص كتيرة أول ما تقابلهم مشكلة وهما بيكتبوا الأوامر البرمجية بيأحبطوا وبيبقوا مش عارفين يعملوا إيه؟ عشان يقدروا يحلوا المشكلة اللى بتقابلهم، فأنا هشارك معاكم فى المقالة دى ( إزاى بحل أى مشكلة بتقابلنى مهما كانت صعوبتها ).

💡 فى شويه خطوات لازم تتبعهم أول ما يقابلك مشكلة وأنت بتكتب سطور البرمجة:

1. مُراجعة الكود بعناية Review code

– أول خطوة لازم تعملها إنك تراجع الكود بالكامل بعناية مره واتنين وتلاته لحد ما تزهق، لأن أنت متقدرش تحل مشكلة وأنت مش عارف مكان المشكلة فين بالظبط؟ اللى موقفة عمل البرنامج + أنك مش فاهم المشكلة من الأساس! فمستحيل تقدر تحلها وأنت مش فاهمها، فأنت كل ما كنت فاهم المشكلة أكتر، كل ما كان حلها أسهل وأسرع.

💡 مُلاحظة: معظم الأخطاء اللى معظمنا بيقع فيها وبتبقى تافهه، إنك مثلا نسيت تكتب (;) فى نهاية السطر أو () الخاصة بالـ function وهكذا ، تخيل إن الحاجات البسيطة اللى بننساها دى بتوقف عمل الكود كله، فحاول تركز فى الحاجات التافهه دى.

💡فيه Quote جميل جدًا لـ John Johnson وهو “.First, solve the problem, then, write the code“، مضمون الإقتباس إنك لازم تفكر فى حل المشكلة الأول قبل ما تكتب أى حاجه، وبعد ما تحل المشكلة تبدأ بكتابة الأكواد البرمجية، وليس العكس.

💡 راجعت الكود بالكامل كتير ومعرفتش تحل المشكلة بردوا!، تدخل على الخطوة الثانية:

2. إسأل جوجل Ask Google

فيه أشخاص أول ما يأحبطوا من حل مشكلة معينة يذهبوا مباشرًا لى أى شخص ليحل لهم هذه المشكلة، لكن هذه الطريقة غير صحيحة نهائيًا ومستحيل تكون مبرمج محترف أو ناجح ، فأنت معرفتش تحل المشكلة بنفسك إبدأ إسأل جوجل وحاول تبحث بالـ English عشان تلاقى إجابات أكبر وأفضل.

على سبيل المثال أنا واجهنى مشكلة فى الربط بين جدولين فى قواعد البيانات، فأكتب كالتالى فى حقل البحث (?How i link two tables in database) وهكذا أى مشكلة بتواجهك، هتلاقى إجابات كثيرة وبطريقة إحترافية أيضًا.

💡 بحثت كتير على جوجل وملقتش حل لمشكلتك! تدخل على الخطوة الأخيره:

3. إطرح مشكلتك على جروبات الفيسبوك أو على شخص ذو خبرة

إبدأ إطرح مشكلتك على جروبات الفيسبوك هتجد أشخاص كثيرة تشاركك فى حل المشكلة، أو إطرح المشكلة على شخص تعرفة مُتمكن وعنده خبره فى المجال لأنه بنسبة 80% واجهته هذه المشكلة من قبل، فبالتأكيد هيفهمك ويحللك المشكلة.

💡 مُلاحظة مهمة جدا: لو أنت بقالك فترة كبيرة وأنت بتحل فى مشكلة ومش عارف توصل لحل، فأقفل كل حاجه ونام ساعتين تلاته، لأن ممكن تكون المشكلة سهلة وقدام عينك لكن أنت فقدت تركيزك، مش أكتر. 

💡 دوول الـ 3 خطوات اللى أى مبرمج محترف بيتبعهم، يارب تكون إستفدت، متنساش تتابعنا على مواقع التواصل الإجتماعى لمعرفة كل جديد، ولدعمنا.